WAHENGA TUMECHOKA SASA TUTALIAMSHA DUDE


Nimetoka kwenye mkutano wa muhimu sana. Mkutano wa siri sana, na kwa kweli tulichoamua kitashtua jamii. Unajua jamii yetu hii, ina watu wakorofi sana, wakiona mtu umenyamaza basi itaanza kukuchokoza inataka useme ukiamua kukaa kimya basi wataendelea kukufanya uonekana fala. Sasa tumechoka tumeamua kupanga mikakati na kwa kweli habari yetu mtaisikia muda si mrefu, maana tulishasema toka zamani, akumulikae mchana usiku atakuchoma. Katika watu waliokuweko kwenye mkutano leo,  tumebahatika kuwa na wataalamu wengi tu, najua kwa hapa kwetu nikisema wataalamu kila mtu anafahamu nina maana gani, hawa ni watu ambao wanaweza kufanya mambo ambayo hata wanasayansi wazungu wanabaki wameduwaa hawajui kinachoendelea, wataalamu wetu  wanaweza kusafiri kwa ungo wakatoka Dar mpaka Mtwara na kurudi katika muda wa masaa machache tena bila kutumia petrol, wala mafuta ya taa. Wataalam wetu wakiamua wanaweza kumshusha mtu mshipa bila hata kumgusa, kwa kifupi wanaweza kutoa adhabu nzuri tu kwa watu wakorofi. Sasa  katika moja ya maazimio makuu ya kikao chetu, wataalamu hawa wamepewa jukumu kubwa sana la kutafuta adhabu nzuri sana kwa watu  ambao ni wameamua kutuchokoza, ni sisi tuliosema toka zamani, ukitaka kumchinja nyani usimuangalie usoni.  Kikao kilifanyika katika hali ya usiri mkubwa, kwanza tulitumia mbinu za kiintelijensia kupeana taarifa kuhusu mkutano huo, baada ya hapo hata ukumbi tulioutumia ulikuwa ni siri kubwa, lakini tumeweza kukamilisha kwa mafanikio makubwa, tulishawahi kusema penye wazee haliharibiki neno. Kwa miaka mingi sisi tumekuwa kimya sana tukiiongoza jamii katika mambo mengi ya msingi na kutoa ushauri ambao umesaidia wakubwa na wadogo, hatukutaka sifa wala kiki, tulitimiza majukumu yetu kiroho safi kama mnavyosema kwa lugha ya siku hizi. Lakini bila sisi kuwachokoza , ghafla kila mahala mmeanza kutuchokoza, kwenye mitandao mumeweka picha za kejeli, zikisema ohh wahenga wamefanya hili, ohh huyu ndie muhenga aliyesema lile, jamani tumewakosea nini? Sasa tunaliamsha dude, wale walioanzisha utani kwa wahenga, na  wale walioendeleza utani kwa wahenga, mjitayarishe, wataalamu wamekwisha ruhusiwa kubuni adhabu, hivyo kama ulikuwa mmoja wapo usishangae asubuhi ukiamka ukakuta umelala bafuni, ni sisi tuliyoleta msemo, ‘akutendae mtende’.  Wale waliotuchokoza nawashauri tafuteni wahenga waliojirani mkajisalimishe kwani tulisema toka zamani kuwa huwa tunasamehe saba mara sabini na saba. Ila wale wanaodharau wakumbuke tulikwisha sema mdharau mwiba huota tende. Wahenga hatuna zaidi ya onyo la leo, kwani tulikwisha sema zamani usimwamshe aliyelala.

No comments:

Powered by Blogger.