HATUPIMI BANDO

WADHAMINI

28 July 2017

SIPANDI TENA BASI LA NANIHII, MATUSI MATUPU


Yaani huwezi amini lakini kilichonitokea wiki iliyopita kimenikosesha amani kabisa, nilikuwa nimepanga wiki hii niwe kijijini kwetu nikiwa na furaha, mambo yako tofauti nabaki nahangaika kujificha ficha kama panya. Kosa ni kampuni ya basi moja isiyo na upeo wa kimaadili. Mwezi mmoja uliopita mama mkwe alikuwa amaekuja kututembelea kutoka kijijini. Alikuwa anaumwa kidogo na pia alikuwa kaja kuwasalimia wajukuu zake. Mambo yalienda vizuri aliweza kupata matibabu na nyumba ikawa na furaha. Sasa sisi ni kati ya watu ambao bado tunaoheshimu mila za Kiafrika, mama mkwe ni mtu anaeheshimika sana na yeye ananiheshimu sana mimi, kimsingi tunajitahidi kukwepana ili heshima iwepo kubwa. Ingekuwa zamani hata kuishi nyumba moja na mama mkwe isingewezekana ingekuwa mwiko. Basi siku za mama mkwe kukaa kwetu zikaisha na tukawa tumepanga wakati anarudi kijijini, turudi wote maana na mimi nilikuwa na kalikizo ka wiki mbili. Pia ingesaidia watoto wakujue kwa bibi yao, wasije wakadhani wao ni wa mjini. Nilikata tiketi mapema ili isije ikatokea mimi na mama mkwe tukalazimishwa kukaa kiti kimoja. Siku ya safari watoto wetu wawili, mke wangu na mama mkwe tukaingia kwenye basi mapema tayari kwa safari ya kwenda kwetu mikoa ya kusini. Mambo yalikuwa safi, kiyoyozi kikawashwa, viti vya mneso na  tulipofika Kibaha video zikaanza kuonyeshwa. Sikuwa na hili wala lile nilikuwa nasoma gazeti lakini nikawa nausikia muziki. Ghafla nikasikia watoto wangu wanacheka wakaanza kumwabia bibi yao, ‘Bibi  bibi ona yule kavaa kichupi kama changu’ Dah nikashtuka, kuangalia naona video kwini ‘anamwaga lazi’. Dah balaa gani tena hii asubuhi mapema hivi, nikakata jicho kumuangalia mke wangu namuona kajifunika kanga usoni anajidai kalala, mama mkwe nae kaficha uso, watoto wanazidi kushangilia, sauti zao ndio zinasikika basi zima, ‘Baba baba angalia likubwa lizima limevaa kichupi’. Dah nikajificha nyuma ya gazeti hata maandishi siyaoni Ukaisha wimbo wa kwanza ukaja mwingine ikawa balaa zaidi, pakukimbilia hakuna kila wimbo wanashindana kumwaga lazi, hata wimbo mtu anaongelea namna ya kupata pesa lakini video inaonyesha vibinti havina nguo za kutosha, basi ikawa adhabu kubwa mpaka tulipofika Morogoro. Kufika Moro, mama mkwe akamuita mke wangu na kumwambia wazi hawezi kusafiri na mkwe kwenye basi moja katika mazingira ya video zile. Nikamuomba konda abadili video akajibu ile ndio wateja wanapenda. Kukawa hakuna jinsi bali mimi nishuke  au mama mkwe ashuke, nikashuka mimi na kuruhusu familia itangulie mimi nitafute basi jingine. Basi toka nimefika huku kijijini bado hakuna amani kati yangu na mama mkwe, kila tukikutana tunakwepana, kikwetu kuangalia picha za aina ile pamoja na mama mkwe na watoto si sawa kabisa, lazima mkosi mkubwa utatufikia hata sijui nitumia tambiko gani kufuta uchuro ule

No comments: